Yangon Golf Club

၁၈၈၅ ခုနှစ်တွင် ဗြိတိသျှတို့ မြန်မာနိုင်ငံကို အပြည့်အဝ သိမ်းပိုက်ပြီးနောက် ရန်ကုန်မြို့သည် နိုင်ငံတကာအဆင့်မီ အရေးပါပြီး စည်ကားသော ကုန်သွယ်မှုဗဟိုချက်တစ်ခု ဖြစ်လာခဲ့သည်။ ထိုစဉ်က Bombay Burma Co.၊ Burma Oil Co.၊ Steel Brothers၊ Rowe & Co. နှင့် Irrawaddy Flotilla ကဲ့သို့သော ဗြိတိသျှစီးပွားရေးလုပ်ငန်းကြီးငယ်များစွာ ရန်ကုန်မြို့တွင် ရှိနေခဲ့သည်။ ထိုကုန်သွယ်ရေးလုပ်ငန်းများမှ အကြီးတန်းဝန်ထမ်းများ၊ ဗြိတိသျှတပ်ရင်းများမှ အရာရှိများ၊ အဆင့်မြင့်အုပ်ချုပ်ရေးမှူးများနှင့် ကုန်သည်များသည် ၎င်းတို့၏ လူကြိုက်များသော အပန်းဖြေအားကစားနည်းတစ်ခုဖြစ်သည့် ဂေါက်သီးရိုက်ကစားနည်းကို ရန်ကုန်မြို့သို့ ယူဆောင်လာရန် ဆုံးဖြတ်ခဲ့ကြသည်။ ထို့ကြောင့် ၁၉၀၉ ခုနှစ်တွင် Mr. G. Ballance ကို ပထမဆုံး ကလပ်ဥက္ကဋ္ဌ (Captain) အဖြစ် တင်မြှောက်ကာ ယခုလက်ရှိ ဒညင်းကုန်း (Danyingon) တွင် ရန်ကုန်ဂေါက်ကလပ် (Yangon Golf Club) ကို စတင်တည်ထောင်ခဲ့သည်။ ကလပ်တွင် ဂေါက်ကွင်းနှစ်ခု ပါဝင်ခဲ့ပြီး တစ်ခုမှာ မြို့၏မြောက်ဘက် ၁၂ မိုင်အကွာ ဒညင်းကုန်းရှိ လက်ရှိနေရာတွင် တည်ရှိသော (၁၈) ကျင်းပါ ဂေါက်ကွင်းဖြစ်ပြီး၊ နောက်တစ်ခုမှာ ပြည်လမ်း (Pyay Road) ၂ မိုင်အကွာ (ယခုအခါ ပြည်သူ့ဥယျာဉ် - People's Park ဖြစ်နေသောနေရာ) တွင် တည်ရှိသည့် (၉) ကျင်းပါ ဂေါက်ကွင်းဖြစ်သည်။ ပြည်လမ်း ၂ မိုင်အကွာရှိ (၉) ကျင်းပါ ဂေါက်ကွင်းကိုမူ ၁၈၉၃ ခုနှစ်တွင် စိတ်ပါဝင်စားသူများ၏ အထွေထွေအစည်းအဝေးတစ်ခု၌ စတင်ဖွဲ့စည်းခဲ့ခြင်းဖြစ်ပြီး ၁၉၀၄ ခုနှစ်တွင် သစ်သားဖြင့်ဆောက်လုပ်ထားသော သပ်ရပ်သည့် ကလပ်အိမ် (club house) တစ်ခု ရှိခဲ့သော်လည်း ကစားကွင်းဧရိယာအတွင်း ဘောလုံးကွင်းနှင့် ဟော်ကီကွင်းများက ဖြတ်သန်းတည်ရှိနေခဲ့သည်။ ၁၉၀၄ ခုနှစ်တွင် ကလပ်၏ ဥက္ကဋ္ဌ (Captain) အဖြစ် Lt. Col. G. B. Crawley က တာဝန်ယူခဲ့သည်။

ထိုစဉ်က ရန်ကုန်ဂေါက်ကလပ်သည် ဒုတိယကမ္ဘာစစ်အပြီးနှင့် ၁၉၄၈ ခုနှစ် မြန်မာနိုင်ငံ လွတ်လပ်ရေးရရှိပြီးချိန်အထိ ဥရောပသားများအတွက်သာ သီးသန့်နီးပါးဖြစ်သော အပန်းဖြေရာနေရာတစ်ခု ဖြစ်ခဲ့သည်။ ၁၉၅၄ ခုနှစ်တွင် William Jack Hardware Co. ၏ အထွေထွေမန်နေဂျာဖြစ်သူ Mr. I. G. Clarke (ဗြိတိသျှလူမျိုး နောက်ဆုံးကလပ်ဥက္ကဋ္ဌ) သည် ပညာရေးညွှန်ကြားရေးဝန် (Director of Public Instruction) ဖြစ်သူ ဦးချိုထံသို့ တာဝန်လွှဲပြောင်းပေးခဲ့ရာ ဦးချိုသည် ပထမဆုံး မြန်မာလူမျိုး ကလပ်ဥက္ကဋ္ဌ ဖြစ်လာခဲ့သည်။